Magaling talaga ang tatay ko

Nangyari ito noong maliit pa ako. Siguro mga 5 taon pa lang ako noon.  Nasa Ilat ako, ito ang pangalan ng baryo namin sa San Pascual sa probinsya ng Batangas (dati e saklaw kami ng Bauan hanggang sa isang plebisito na nalipat kami sa San Pascual noong 1972).  Mamamalagi lang kami sa Maynila kung papasok na kami sa eskwelahan (sa UST kung saan nagtuturo ang tiya ko).  Pag di ka pa nag-aaral, doon ka sa probinsya kasama ang mga magulang mo at ang apat mong lola na puros mga dalaga.

Mahilig sa 'pag-aaluwagi' (carpentry) ang tatay ko. Kaya niyang gumawa ng kahit anong nilalagari at pinapako (syempore kahoy yon), eskaparate (cabinet), bangko (bench), bangkito (stool), pala-pala (table-top),  pasamano (counter), 'tree-house' (sabi ito ng mga kapatid ko pero di ko inabot), at mga bagay tulad ng papagayo (saranggola), uyayi (swing), duyan (hammock), at marami pang iba.  Magaling talaga ang tatay ko, ewan ko kung bakit di ko namana ito sa kanya.  Mabilis siyang magmakinilya (typewriter), maganda siya sumulat (penmanship), magaling din siya sa 'grammar' at 'correspondence', magaling siya magtasa ng lapis gamit ang 'blade' (eto hindi ko talaga magawa), alam niya mga larong baraha (solitaryo at mga larong pang-sugal), alam niya 'rules' ng halos lahat ng 'sports with balls', kahit saan lugar mo siya itapon sa Maynila, at kahit sa ilang probinsya, e di siya mawawala (commuting and driving)... magaling talaga ang tatay ko.

Hindi siya takot sa ahas, tuko (papatayin niya mga ito sa isang hataw ng tikin o long stick), bangkalang (bubuli), bayawak, daga (nakita ko nung pinukpok niya ng palu-palo ang isang napakalaking daga, mas malaki pa sa pusa) at higit sa lahat, hindi siya takot sa multo o mga lamang-lupa ( pero nagtatabi-po siya pag nasa lugar na bago niyang dinadaanan)... magaling talaga ang tatay ko.

Marunong siyang magkumpuni ng sasakyan, mga kuryante at ilaw sa bahay, umaakyat siya sa bubong ng bahay namin at sa ibabaw ng tanke (water tank) at hindi siya nalulula o natatakot mahulog, Marunong siya magpatulog ng bata, magkatay ng baboy at manok, magluto, mamalantsa, maglaba, mag-'gardening' at iba pang gawaing bahay...magaling talaga ang tatay ko.